سندھو کتھا ایک ایسے دریا کی کہانی ہے جو صدیوں سے تبت، لداخ اور گلگت بلتستان سے لے کر بحیرہ عرب تک اپنے کنارے بسنے والوں کی تہذیبوں اور قدروں کو سمیٹے رواں دواں ہے۔ صدیوں پر محیط اس روداد کو اس دریا کی زبانی قرطاسِ ابیض پر بکھیرنے والے اس کے کناروں کے باسی ہیں۔ دریائے سندھ ڈاکٹر مظفر حسین انجم کے سینے میں لہو کی طرح رواں ہے اور وہ بچپن ہی سے اس دریائے سندھ کے طلسماتی وجود کے سحر میں گرفتار ہیں۔ ایک ماہر فزیشن سے لے کر ایک کہنہ مشق مصنف تک کا سفر مظفر نے اسی سندھو ساگر کے کناروں پر طے کیا ہے۔ ان کے منفرد اندازِ بیاں نے اس کتاب کو دریائے سندھ پر لکھی گئی تمام کتابوں میں ایک منفرد اور ممتاز مقام عطا کیا ہے۔
